Ghjà l’agghju fatta bona a no sapè cos’era

Standard

In li di passati, da muntagninu, mi socu missu a faiddà di “ruzzu”, senza mancu sapè cos’era, in fundu ca ma ripresu haia li so ragjoni pa fallu. Uno chi n’arrea da fora e chi capitighja in Lungoni da appena sessantacinq’anni, undi ha presu mudderi da una familia chi di mari no n’ha mai cumpresu nudda, saria statu gjustu chi aessia auto un pocu di cilevrio prima di lampà parauli a fanfara.

Chirendi scusa a tutti li lungunesi pa essemme fidatu di un pocu di passoni chi erani chi in la spiaggja, ancora iddi di fora, chi n’erani lampendi l’aria e tuttu lu mundu, a smaniattati, buchendici li muschi chi sill’erani magnendi, dapoi daé ascultatu li so ragjoni, aghju pinsati di piddà un pezzu di paperie una pinna e mi socu missu a iscrì pinsendi di fa una cosa bona a richjammà l’attinzioni di ca cridia chi pudia fa calche cosa pa rimidià la cosa.  L’aghju fattu palchì  ca era fendi la prutestia erano turisti, di chiddi chi haini sciuarato Lungoni pa passà calche ciurrata bedda in lu locu più beddu di lu mundu.

No mi saria crettu mai chi li me parauli, scritti pa lu bonu diani fa attidià tanti passoni, pinseti, ancora passoni manni abbeddu chi di ruzzu (a no aellu imparatu innanzi, mi saria puduto rigulà meddu) si n’intendini. Eu, colciu a me, undi lu dia imparà? In Caragnani non vi n’è mai statu, a Roma no n’aggju istu mai, la me ispirienza  s’agabba tutta chi. Misciacci lu Sindacu non eri in lu me intentu, resuscità lu colciu Acchjappamusci, chi era una bon passona, ancora di mancu, scumudà l’alta pulittica, peggju ancora.

Eu, colcia a me, aggjti pacienza, socu abituatu a di lu chi pensu, candu possu, cilcu sempre di fallu pa fa bé, siddu chista olta la sincerità no è piaciuta a calche d’uno, m’appellu alla so buntai e allu so bon cumprindimentu palchì mi oddia paldunà, tinendi contu chi socu sempri uno di fora.

Vi prummettu chi siddu duissia capità che calche cosa non mi piaci e non mi la possu tinè, mi faraggju primura d’attrugavillu prima, maccari in gadduresu in manera chi li di fora no cumprendini. Ma  precu a tutti, no scumudeti li passunalitai, chissi è meddu non cilcalli, non si sa mai, pudaiani ammusciassi  e tandi si chi li cosi s’imbruttani, è meddu tinelli fora iddi si chi poni fa danni manni. Eu, pa lu chi possu, agghju a cilcà di stamminni allonga.

Avvidecci sani a tutti.